Kvennaár í Neskaupstað

Hópur Rauðsokka að sunnan heimsótti Neskaupstað á vordögum á kvennaári 1975. Þær héldu kynningarfund um hreyfinguna í félagsheimilinu Egilsbúð, sem auglýstur var á vegum „10 Rauðsokka“, sögðu frá starfi sínu og markmiðum og sátu fyrir svörum. Daginn eftir tóku þær þátt í ráðstefnu sem haldin var í Gagnfræðaskólanum um kjör kvenna til sjávar og sveita sem starfshópur kvenna í bænum hafði undirbúið. Um 40 manns, bæði konur og karlar, sóttu ráðstefnuna (íbúar í Neskaupstað þá um 1.600). Konur lýstu aðstæðum sínum og kjörum, kynntar voru niðurstöður könnunar á þátttöku kvenna í atvinnulífi bæjarins og opinberum nefndum, starfað í starfshópum og endað með umræðum. Samþykktir og ályktanir voru sendar meðal annars til ASÍ og skólanefndar Neskaupstaðar.

Nokkrum dögum síðar var einni af stofnendum Rauðsokkahreyfingarinnar, Gerði G. Óskarsdóttur, falið af halda eina af þremur ræðum á 1. maí dagskrá verkalýðsfélaganna í bænum ásamt tveimur körlum. Í tilefni kvennafrídagsins birtust svo viðtöl við níu konur á forsíðu vikublaðsins Austurlands. Allar nema ein ætluðu að taka sér frí. Flestar töldu mikilvægast að sýna samstöðu og draga fram mikilvægt framlag kvenna í þjóðfélaginu, bæði í atvinnulífi og á heimilum, þótt þær væru ekki vissar um að fríið breytti í sjálfu sér miklu. Kröfurnar voru um jafnrétti á vinnumarkaði, einkum í ráðningum og launum, og viðurkenningu á að konur væru jafningjar og jafnokar karla.

Alls komu á þriðja hundrað konur saman á Kvennafrídaginn 24. október 1975 í Egilsbúð, þar af hópur kvenna frá Eskifirði, og tóku þátt í dagskrá sem hófst kl. 10:30 og stóð allan daginn með upplestri og söng, meðal annars með frumsömdum textum. Á fundinn bárust skeyti með hamingjuóskum frá skipshöfnum átta báta og sendar voru baráttukveðjur frá fundinum til kvennafundarins á Lækjartorgi.

Samstaða kvennanna varð til þess að fjarsímaþjónusta lagðist af, kaupfélagið varð að loka verslunum sínum, skólahald fór úr skorðum, ekki var unnið í frystihúsinu og börn fylgdu feðrum sínum til vinnu. Sömu sögu var að segja víða um land auk Reykjavíkursvæðisins, til dæmis á Akureyri, Akranesi, Ísafirði og nágrannasveitarfélögum, í Stykkishólmi og Vestmannaeyjum.

Rauðsokkahópur úr Reykjavík heimsótti Neskaupstað öðru sinni, nú á vegum menningarnefndar bæjarins, og hélt kynningu á rit- og myndverkum Ástu Sigurðardóttur í Egilsbúð í mars 1977. Þessi kynning fór víðar um landið.

_{^{Sjá nánar: Kvennafrí.}}