Kvennafrí 1985

Kvennafrídagur 24. október 1985

mynd_3

Árið 1985 var lokaár kvennaáratugar Sameinuðu þjóðanna og margir viðburðir voru skipulagðir af hálfu kvennasamtaka. Má þar nefna gróðursetningu trjáa um land allt og hátíðarfund á Þingvöllum þann 19. júní, en þá voru einmitt liðin 70 ár frá því konur fengu takmarkaðan kosningarétt og kjörgengi til Alþingis. Staðið var fyrir undirskriftasöfnun undir friðarávarp í samvinnu við Friðarhreyfingu íslenskra kvenna sem afhent var á kvennaráðstefnu Sameinuðu þjóðanna í Nairóbí. Haldin var Listahátíð kvenna þar sem sýnd var myndlist, höggmyndalist, húsagerðalist og ljósmyndir eftir konur, haldin var sérstök kvikmyndahátíð kvenna, konur léku á tónleikum eingöngu verk eftir konur, það voru lesin ljóð og leikið og margt fleira. Listahátíðin var sú fyrsta sinnar tegundar á Íslandi. Gefin var út bókin Konur, hvað nú? og rituðu kunnugar konur í hana greinar um löggjöf, menntun, atvinnuþátttöku, laun, forystu, félagslega stöðu, heilbrigðismál og menningarmál.

Þann 24. október opnaði í seðlabankabyggingunni, sem þá var hálfköruð, mikil sýning kvenna er bar heitið Kvennasmiðja. Kjörorð hennar var: Konan - vinnan - kjörin. Sýningin var opin í vikutíma og þar gafst almenningi kostur á að kynnast atvinnuþáttöku kvenna í þjóðfélaginu. Samnefnt dagblað var gefið út og geymir það miklar upplýsingar.

Sama dag og sýningin opnaði var haldinn glæsilegur útifundur kvenna á Lækjartorgi sem talið er að 18 þúsund manns hafi sótt. Því miður hafa ræðurnar sem haldnar voru á fundinum ekki varðveist en hér má sjá auglýsingu um dagskrá fundarins:

auglýsing - konur stöndum saman-litil

Gögn kvennafrídagsins eru varðveitt á Kvennasögusafni. Fleiri ljósmyndir má finna á facebook-síðu Kvennasögusafns.