Nanna Kaaber (1918–2011)

Nanna Ida Kaaber fæddist í Reykjavík 21. maí 1918; lést 5. maí 2011.

Foreldrar: Ludvig Emil Kaaber frá Danmörku, og kona hans Astrid Bertine, f. Thomsen. Alsystkini Nönnu voru Gunnar Georg, f. 1908, d. 1949, Axel Jóhannes, f. 1909, d. 1999, Sveinn Kjartan, f. 1909, d. 1990, Knud Albert, f. 1914, d. 1915, Eva Ásta, f. 1916, d. 1933, Ragnar Eiríkur, f. 1919, d. 1958, Elín Margrét, f. 1922, Knud Albert, f. 1922, d. 1989. Samfeðra systkin Nönnu voru Edda Kristín, f. 1931, Astrid Sigrún, f. 1932, Edwin Mikael, f. 1935 og Eggert Matthías, f. 1939, d. 1945.

Nanna giftist 22.9. 1945 Bjarna Árnasyni, f. 1918, d. 2004, þau skildu. Foreldrar hans voru Árni S. Bjarnason, f. 1879, d. 1969 og kona hans Björg Stefánsdóttir, f. 1880, d. 1968. Þau eignuðust tvö börn.

Kornung dvaldi Nanna með foreldrum sínum á Borgundarhólmi um skeið. Hún ólst svo upp á Hverfisgötu 28 og lauk gagnfræðaprófi frá Gagnfræðaskóla Reykjavíkur. Nanna starfaði við skrifstofustörf um tíma, en lærði svo garðyrkju í Fagrahvammi í Hveragerði. Hún nam garðyrkju- og blómaskreytingar í Árósum og kom heim með síðustu ferð Gullfoss fyrir stríð 1939. Nanna stofnaði blómabúðina Garð við Garðastræti ásamt með Stefáni Árnasyni. Árið 1959 hóf hún að vinna hjá danska sendiráðinu og starfaði þar í 30 ár, fram til ársins 1988 þegar hún stóð á sjötugu. Nanna var einn af stofnendum ferðafélagsins Útivistar, sat í kjarna þess frá upphafi og var heiðursfélagi. Hún var fararstjóri í áratugi og fór í sína síðustu ferð sem slíkur árið 2005, þá 87 ára.

Úr fórum ættmenna. Árni Emil Björnsson, sonur Nönnu, afhenti.

Afhent 25. ágúst 2017.