Margrét Guðmundsdóttir (1834–1919), bréfasafn. KSS 137.

Fædd 2. maí 1834, dáin 19. júní 1919. Bjó á Hrísnesi, Barðaströnd, Vestur-Barðastrandarsýslu. Gift Þórólfi Einarssyni bónda. Átti soninn Sigurð Þórólfsson (1869–1929) sem var faðir Önnu Sigurðardóttur, stofnanda Kvennasögusafns.

Eftirfarandi texti fylgdi afhendingu bréfanna: „Minning móðurömmu minnar, Guðrúnar Guðmundsdóttur ættuð af Seltjarnarnesi, hefir fengið rúm í hefti af Æviminningabók Menningar- og minningarsjóðs kvenna. Föðuramma mín af Barðaströnd verður líka að fá þar inni. Hún hét Margrét Guðmundsdóttir. Ég sá hana aldrei, en ég hefi kynnst henni dálítið af bréfunum sem hún skrifaði föður mínum.

            Bréfin sem ekki hafa glatast eru frá árunum 1910 til 1916. Vegna þess að amma minntist oft á ömmur sínar báðar og móður sína einnig, verður þessi grein einnig um þær. Reyndar segir amma margt frá föður sínum og afa, sem hún dáir mikið. Móðuramma ömmu minnar hét Þóra Eyjólfsdóttir, prests Sturlusonar á Brjánslæk, og maddömu Ragnheiðar Vigfúsdóttur“