Halldóra Bjarnadóttir (1873–1981), heimilisiðnaðarráðunautur og ritstjóri. KSS 168.

Halldóra Bjarnadóttir fæddist 14. október 1873 að Ási í Vatnsdal. Hún ólst þar upp þar til móðir hennar skildi við manninn sinn og þær mæðgur fluttu til Reykjavíkur. Halldóra var heimiliskennari þar til hún hélt til Noregs árið 1896 og lauk kennaraprófi þremur árum síðar. Eftir það flutti hún til Íslands og kenndi við Barnaskólann í Reykjavík en þegar henni var neitað um fasta stöðu þar flutti hún Noregs þar sem hún fékk fasta stöðu. Hún var síðar skipuð skólastjóri Barnaskólans á Akureyri og var í þeirri stöðu frá 1908–1918. Hún flutti aftur til Reykjavíkur árið 1922 og gerðist handavinnukennar við Kennaraskólann.

Halldóra átti þátt í stofnun Sambands norðlenskra kvenna árið 1914 og var fyrsti formaður þess. Hún var ritstjóri Hlínar sem sambandið gaf út frá 1917. Þá stofnaði hún Heimilisiðnaðarfélag Íslands ásamt fleirum árið 1913 og starfaði sem heimilisiðnaðarráðunautur í mörg ár. Í starfi sínu ferðaðist hún landið og hvatti konur til að stofna kvenfélög.

Halldóra var kosin í bæjarstjórn Akureyrar árið 1921 ásamt því að sitja á lista Kvennalistans í Alþingiskoningunum árið 1922 en Ingibjörg H. Bjarnason náði ein kjöri. Halldóra var sæmd riddarakrossi Hinnar íslensku fálkaorðu 1931 og stórriddarakrossi sömu orðu 1971. Hún lést árið 1981 á Blönduósi.

Heimildir: Ártöl og áfangar í sögu íslenskra kvenna, bls. 18 og Nanna Ólafsdóttir, „Halldóra Bjarnadóttir heimilisiðnaðarráðunautur“ Árbók Landsbókasafns Íslands 1990, bls. 35-55. Sjá einnig ævisögu um Halldóra Bjarnadóttur sem Vilhjálmur S. Vilhjálmsson skrásetti 1960.