Menningar- og friðarsamtök íslenskra kvenna (MFÍK) (st. 1951)

Menningar- og friðarsamtök íslenskra kvenna voru stofnuð 5. júlí og á framhaldsstofnfundi 9. desember 1951. Samtökin áttu rætur að rekja til Friðarnefndar kvenna sem stofnuð var 1950. Friðarnefndin var starfsnefnd róttækra kvenna í Reykjavík ásamt aðildarfélögum sem kusu friðarnefndir úr sínum hópi. Aðild að nefndinni áttu Félag starfsstúlkna í brauð- og mjólkursölubúðum (ASB), Nót, Félag netagerðarmanna, Mæðrafélagið, Kvenfélag Sósíalista, Sókn og Verkakvennafélagið Snót. Frumkvöðull að stofnun Friðarnefndarinnar var Þóra Vigfúsdóttir. Á undirbúningsfundi að stofnun Menningar- og friðarsamtaka íslenskra kvenna, 5. júlí 1951, var Viktoría Halldórsdóttir sjálfkjörin fyrsti formaður samtakanna. í aðalstjórn voru kosnar þær Guðrún Gísladóttir, Ásthildur Jósefsdóttir, Erla Egilsson, María Þorsteinsdóttir og til vara þær Guðrún Guðjónsdóttir og Ása Ottesen. Samtökin áttu aðild að Women's International Democratic Federation og sendu iðulega fulltrúa fyrir Íslands hönd á þing þess. Á fundi samtakanna 5. febrúar 1952 voru lög þess samþykkt.

Í 3. grein laganna segir: „Markmið félagsins er að sameina allar íslenzkar konur, án tillits til stjórnmálaskoðana, til baráttu

1. fyrir alheimsfriði
   b. fyrir öryggi og framtíð barnanna
   c. fyrir vináttu og samvinnu kvenna í öllum löndum
   d. fyrir hernaðarlegu hlutleysi Íslands
   e. gegn hverskonar hernámi og þeim hættulegu áhrifum, sem seta erlends herliðs hefur á æskulýð landsins, og menningu og tungu þjóðarinnar.
   Einnig segir að markmiðum félagsins skuli náð „með fundahöldum og víðtækri fræðslustarfsemi meðal kvenna landsins“.

Heimild: Ártöl og áfangar í sögu íslenskra kvenna

Gögn MFÍK fundust í kjallarageymslu á Hjarðhaga 26, þar sem Anna Sigurðardóttir bjó og Kvennasögusafn Íslands var til húsa til ársins 1996. Afkomendur Önnu voru að tæma geymsluna og við það fundust kassar merktir MFÍK. Var margvíslegt efni þar að finna, m.a. myndbönd. [Tilvísun: KSS 2018/16]